Pòdzemia Jantarowégò Grifa - gra rpg zortu dungeon crawler

Spòdlowé statisticzi klasów pòstacjów:

Niżi je tôbelka z pòdstawama dlô pòsobnëch klasów pòstacjów. Pamiãtôj, że gra je w czasu prototipù i wcyg warô szukanié balanksë rozgriwczi. Spòdlowé statisticzi mògą sã zmienic.


	Barch	Jachtôrz	Dulas	Ricerz	Leman
Móc	14	10	10	14	13
Chwatkòsc	10	14	13	10	11
Wëtrzëmałosc	10	10	11	10	10
Mądrosc	10	10	10	10	10
Zdrowié	15	10	10	15	15
Mana	0	10	10	0	0
Dokładnosc	60%	40%	30%	60%	60%
Zastôwianié	0%	20%	30%	0%	0%
Zbrojô	3	2	2	4	3


	Maga	Kùtin	Żérca	Gùslin
Móc	10	10	10	10
Chwatkòsc	10	10	10	10
Wëtrzëmałosc	10	10	10	10
Mądrosc	14	14	14	14
Zdrowié	8	8	8	8
Mana	20	20	20	20
Dokładnosc	20%	20%	10%	10%
Zastôwianié	10%	10%	20%	20%
Zbrojô	1	1	1	1

Barch

Barbarzińca, mało rozëmny, ale baro mòcny i rãdi, wëtrzëmałi na sztuksë, drażlëwi – letkò gò nawiesc do biôtczi. Lubi wiele i dobrze zjesc i wëpic. Czej czëje krew, dostôwô górz do biôtkòwaniô – rozniese kòżdégò procëmnika na sztëczczi, ale w biôtce mòże téż renic abò zabic swòjôka. Baro dobrze władô toporama i kòżdą biôłą barnią..

Jachtôrz

Baro dobri pòlownik – mô starã ò jedzenié dlô swòjich kómpanów, nié leno rozmieje ùpòlowac to nôlepszé, ale téż dobrze przëszëkòwac. Bëlny szwania – naléze nôkrótszą drogã do celu, baro dobrze czëtô szpùrë i znaczi, co je òstôwiają zwierzãta, lëdze i pòtwòrë. Sprawno strzélô z łãkù i jinëch zortów strzélający i miotający barni, np. pùszczówków.

Dulas

Zwóny téż kùńda, co w gôdce Kaszëbów znaczi chitrzélc. Je bëstri, prëk i lësowati. Bëlny szwania i jachtôrz, chòcô barżi lubi krasc jak jachtowac. Rozmieje kłoc dolchama. Ni ma zómków i skriwków, jaczich bë nie òdemknął. Nôbëlniészi drëch do zabawë.

Ricérz

Wòjôrz, baro dobrze przëszëkòwóny do biôtczi. Cwiardi i wëmôgający, ale szlachetny. Biôtkùje sã w miono dobra. Barni słabëch i biédnëch, czułi na snôżotã białków. Biôtkùje dobrze piechti, a téż na kòniu. Jegò ùlubioną barnią je miecz, ale rozmieje ùżëwac barń kòżdégò zortu. Mô òblokłé zbrojã.

Leman

Wòlny chłop, chtëren rozmieje sec kòsą, a téż mieczã na dwie starnë. W czasach pòkòju òbrôbiô swój môłi sztëk zemi. Na nikògò nie słëchô, wierzi le sobie i swòjémù rozëmòwi (nie jidze ò żeniałëch Lemanów, chtërny pòkórno słëchają swòjich białków). W czas wòjnë dzyrskò stôwôł do biôtczi. W bitwie je chùtczi, tak jakbë chcôł jak nôrëchli zakùńczëc bijatëkã i jic nazôd dodóm.

Maga

Czarzélc, kapłón słowiańsczégò bòga swiata pòdzemi Welesa. Nielëdóny przez kómpanów, bò ùżiwô czôrny magii, co pòchòdzy z pòdzemnégò swiata. Drãgò òdczënic zaklãca, jaczima cëskô. Swòjã mòc bierze ze szlachetnëch kamieni, kriształów i bùrsztinu. Colemało gôdô z dëchama przódków, ù jaczich szukô radë. Nekromanta – rozmieje pòznac żëcé ùmarłégò zwierzãca i człowieka, czej zbadô jich wątpia.

Kùtin

Czarzélc, co dostôł mòc cëskaniô bòjowëch czarów. Do tegò, jinaczi jak Żérca, nie brëkùje zéla, sygną mù zaklãca i pasowné zrëchë. Wrogów mòże dozdrzec za pòmòcą czarzélsczégò zdrzadła, przez chtërno widzy dalek– mòże téż cëskac tą drogą czar.

Żérca

Kapłón pòmòrsczégò bòga Peruna, jednégò z nômòcniészich słowiańsczich bògów. Rozmieje czarzëc, a swòjã mòc bierze z wòdë, zemi i ògnia. Wierã mô mòc nad grzmòtama. Rozmieje wëlékarzëc zelama i zaklãcama. Czarzbón, co czëtô wòlã bògów z lôtaniô ptôchów, czerënkù wiatru, farwë nieba i wòdów. Òbczas biôtczi cëskô òchrónné zaklãca na swòjich kómpanów, a przekleństwa na procëmników.

Gùslin

Czarzélc, co swòjã wiédzã bierze przede wszësczim ze swiata rodë. Mô namkłé na czôrną magiã. Baro dobrze znaje sã na zelach, z jaczich rozmieje przëszëkòwac lékarstwò na kòżdą chòrosc. Zelama lékarzi renë zadóné biôłą bronią. Bëlno znaje sã na lëdzczi nôtërze – chòdzy takô gôdka, że rozmieje czëtac dëszã człowieka, wzérającë mù w òczë. Klarëje snienia. W czas biôtczi wspiérô swòjich drëchów, wzéwającë sëłë nôtërë do pòmòcë.

Swiat grë

Klasë pòstacjów

Zbierzë grëpã